Amerígunnar Erlingsson

Fondúrugl

Við ákváðum að bregða út af vananum á dögunum og átum kvöldverð með Amín, Hressa og Heklu. Fengum þau yfir í urrandi fondú að hætti Hússeins. Daginn fyrir og á eftir borðuðum við líka með þeim en það má segja að það hafi verið algjör tilviljun.

Mannskapurinn bíður átekta. Gunnar Magnús orðinn óþreyjufullur að fá að dýfa gafflinum ofan í sjóðheita olíuna. Hér leikur hann afríkufíl til að sýna ljósmyndara hve spenntur hann er.

Mæja, Grímur og Anna bíða spennt eftir að Sonja beri fondúgeðveikina á borð.

Eins og sjá má á Heklunni var þema kvöldsins nærbuxur. Allir fondúgestir áttu að mæta á nærbuxunum. Eftir að Hressi hafði fengið kaffi og koníak brá hann á leik með ljósmyndara og sýndi honum allar helstu tannskemmdir sínar.

Gámi gám

Hér vestan hafs er allt að verða vitlaust við undirbúning búferlaflutningsins mikla. Fáum afhent 15. desember og byrja líka að vinna sama dag. Einnig gaman að segja frá því að ég tók bæði atvinnutilboðinu og gerðum tilboðið í Garðastrætið sama dag. Alveg hreint magnaður andskoti.

María gaggar í mér allan daginn að taka flottan töffarajeppa með heim. "Nýjan Grand!", "Explorer Eddie Bauer, eða ég hætti að elda," segir hún allan daginn. Ætli maður verði að láta valta yfir sig eina ferðina enn. Annars er mjög mikilvægt að eiga töffarajeppa - ég þekki það manna best. Þegar öllu er jú á botninn hvolft í lífinu er þetta bara spurning um að vera gæi.

Dagarnir hérna fara í að ramba milli húsgagnaverslana, kaffihúsa, veitingahúsa og útihúsa (Hressi aðallega). Nú er verið að vinna í að panta gám og það á að hnoða ýmsum af þeim munum sem okkur hefur áskotnast undanfarin tvö ár, til viðbótar við ýmiss konar nytjavarning.

Fór á Placebo á Showbox. Ljómandi hressir hommar. Þar lék einnig fyrir dansi hljómsveit að nafni She wants revenge. Minnti dulítið á Interpol, nema Interpol er mun hressari.

Erum að hugsa um að leigja okkur sumarhús undir rótum Reynisfjalls næstu helgi eða skreppa jafnvel til Vancouver BC. Nánar um það í næsta tölublaði.

Malí og litli kútur á hallóvín-hátíðinni í Radfordinu. Það eru fleiri hallóvín-myndir á heimasíðu JB og Magneu.

Hekla sýnir múttu sinni hvernig á að búa til súkkulaðiköku.

Við létum okkur ekki vanta í Valle móttökuna enn eitt árið. Einungis Bobbie á Valle skrifstofunni hefur mætt oftar en María. Á myndinn sést hvernig veislugestir fylgjast agndofa með Jóni Marvin fara með gamanmál. Hann sagði meðal annars nokkra mjög fyndna brandara um Pétur Vilhjálmsson, fyrrum nágranna minn.

Gunnar Magnús varð hressari og hressari eftir því sem leið á móttökuna mamman varð ölvaðri.

Malí mín vildi ólm komast í kjötbolluát með sósu og rifsberjahlaupi í IKEA einn daginn. Eins og sjá má á myndinni er fólkið bakvið Malí í þann mund að tvíbæta Washingtonmet sitt í raðkappáti innanhúss.

María er listræn. Hún tók þessa fallegu mynd af I-5 á leiðinni í bæinn.

Það kemur fyrir að vistmenn #4013 kíki í heimsókn til okkar, og öfugt. Við vorum með hressa matargesti hjá okkur sl. laugardag. JB og Magnea, og Amín, Grýlur og Hekla kíktu í kalkún og með því. Meðal veitinga var þessi prumpkin súkkulaðiterta. Sannkölluð veisla fyrir bragðlaukana eins og merkja má af svip Heklu.

Sonja frá Póllandi, ný au pair hérna í Rassfordinu, sá um að pensla kalkúninn áður en veislugestir létu sjá sig. Sonja, sem talar litla íslensku og þaðan af síður ensku, ætlar að sjá um að raða í gáminn fyrir okkur. Áhugmál hennar eru dægurlagatónlist og frímerkjasöfnun.

Tilkynning

Vegna fjölda athugasemda kemur hér færsla. Það er nú fátt búið að gerast hérna í Sívætlu annað en að ég fer nánast daglega með Amín og Heklu í U-Village og fæ mér kaffi og hádegismat, förum svo út að borða eftir síðdegisblund og svo drekk ég bjór og horfi á Family Guy eða South Park með Hressa, mági (e. seagull) mínum. Ef ég finn eyðu í prógramminu slæ ég í tennisbolta eða fer í skvass.

Vefsetrinu hefur annars borist tilkynning þess efnis að The Erlingsson Family hyggst flytjast búferlum til lands elda og ísa. Landið er einnig þekkt sem heimaland íslenska hestsins (ég eftirlæt nú lesanda að geta hvert landið er). Ég er sem sé kominn með vinnu í ævintýraborginni Reykjavík, sem er betur þekkt fyrir hóflegt verðlag og blíðskaparviðri. Í kjölfarið gerðum við kauptilboð í íbúð við Garðastræti 17 sem var samþykkt. Fáum afhent um miðjan desember.

Við erum því líka þessa dagana að þeysast milli húsgagnaverslana og láta hugann reika. Við ætlum nefnilega að nýta hvern einasta rúmsentímetra í gámnum sem við tökum með heim af alls kyns drasli sem við höfum sankað að okkur undanfarin tvö ár. Meðal þess sem mun verða flutt heim er blaknet, jólatrésfótur, hjónarúm, kælibox, fondúpottur og bleyjur fyrir litla kút svo fátt eitt sé nefnt. Ég á nú eftir að taka eina grand finale ferð í Costco þar sem allur andskotinn verður keyptur - ef ég þekki mig rétt.

Jæja, hérna koma huggulegar myndir af huggulegu fólki. Vinsamlegast prentið þær út og njótið þeirra.

Hekla og Gunnar Magnús að borða fajita bourito á Chipotle. Gunnar Magnús missti sig alveg og drakk tvo lítra af tabasco sósunni meðan mamma hans leit undan.

Amín, Hekla heimsborgari og útlendingur sem við fundum og okkur fannst svipa til Gríms. Hekla drekkur aðeins fjórfaldan espresso. Henni finnst ekki taka því að taka þrjú skot.

Fengum okkur hamborgara eitthvert hádegið á Pike Place Market þar sem þetta skilti var við eitt sætið. Við sætið við hliðina á stóð "VIDAR LU POOPED HERE when he visited Seattle".

Það vantaði bjölluna í Gettu betur (Borghildur er með hana í láni) og þess vegna þurfti að slá á mitt borðið í bjölluspurningunum. Grímur ruglaðist hins vegar nokkrum sinnum og prumpaði óvart í staðinn. Þá kom vond lykt. Þessi mynd er tekin við slíkt tækifæri.

Malí og Gunsmoke jr. úti að borða í hádeginu.

Gunnar Magnús les fyrir frænku sína.

Jei, jei, Gunnar Magnús.

Litli kútur að borða pasta hjá Amín.

Blómarósin hún María má ekki sjá til sólar öðruvísi en að taka fram frisbídiskinn. Ég sé eiginlega hvort það sé gott eða vont veður með því að athuga hvort frisbídiskurinn sé á sínum stað þegar ég vakna.

Kúluskítur

Ekkert nýtt í þessu. Búinn að fara í tvö viðtöl. Sjáum hvernig það fer. Hitti einhvern böseling í Securitas-búning á leiðinni í viðtalið. Hann hafði orð á því hvað jakkafötin mín væru falleg og óskaði mér góðs gengis. Eftir viðtalið hitti ég hann aftur; hann spurði mig hvernig gekk og sagðist vonast til að sjá mig aftur á svæðinu. Jammjamm.

Annars allt að gerast hérna í Rassfordinu. Við erum að vinna í Little Britain á Netflixinu þessa dagana með Hressa mávi. Það er voðafínt með einum Fat Tire og nammi.

Ble.

Hressandi myndir

Á leið í heimsókn til Önnu, Gríms og Heklu í næsta húsi.

Hressi mávur hafði búið til þessa fallegu samloku handa mér þegar við komum yfir. Egg, beikon, skinka, rækjur, ostur og bakaðar baunir voru meðal þess sem fannst á samlokunni. Á samlokuna vantaði hins vegar sárlega þorskhnakka og graslauksfroðu.

Mæja og Hekla að fara með Gunsmoke jr. til læknis.

Eiturhress.

Heimsborgarar á hóteli við Union Square.

Ávallt hress.

Þessi er líka ávallt hress.

Grímur fer í skólann

Náði þessari skemmtilegu mynd af Grími mávi mínum þegar hann var að fara í skólann. Í bakpokanum hafði hann meðferðis epli, brauð með miklu hnetusmjöri, slönguspil fyrir frímínúturnar og Jónsbók ef hann þyrfti að segja eitthvað lögfræðidót í skólanum.

Verðbólguskot

Eins og sjá má á myndinni er greinilega um verðbólguskot að ræða en ekki verðbólgu. Enn fremur sést glögglega að verðbólguskotið svokallaða er yfirstaðið. Það fer ekkert á milli mála samkvæmt myndinni. Því ætti að vera óhætt að ráðast í umfangsmiklar ríkisframkvæmdir. Einstaklingar ættu einnig að íhuga alvarlega að taka dýr lán til húsnæðiskaupa, fellihýsakaupa eða jeppakaupa því þetta er bara verðbólguskot.

Til gamans má geta þess að lægsta gildið á lóðrétta ásnum er hágildi þolmarka verðbólgumarkmiðs Seðlabankans. 7,6% verðbólga er bara 5,1 prósentustigum hærra en verðbólgumarkmiðið svo það er allt í sómanum því þetta er jú bara verðbólguskot.

Stórfjölskyldan hittist í Kaliforníu

Það hefur ekki farið mikið fyrir skrifum á þessari síðu að undanförnu. Við lögðum af stað til Kaliforníu fyrir tveimur vikum síðan og hittum Önnu, Grím og Heklu í Skeinis. Ókum síðan með þeim til Palo Alto til að hitta Barðstrendinga áður en við keyrðum eftir strandlengjunni til Los Angeles, þar sem við vorum í þrjá daga. Hittum svo Mamba og Öddu Mæju í San Francisco og fórum svo daginn eftir til Palo Alto aftur þar sem við erum búin að vera að miklu leiti. Hentumst þó í tvo daga til Napa til smakka sælkeravín og gera tilraun til að hella Maríu mína fulla.

Anna, Grímur og Hekla fóru á sunnudaginn til Seattle og verða í íbúðinni okkar þar til þau fá sína íbúð afhenta. Við stefnum á að verða komin til Seattle á föstudaginn. Það verður voðagaman að hitta þau. Við erum búin að vera á hótelum í tvær vikur svo það verður líka gott að komast í eigið rúm.

Það er langt síðan ég skrifaði eitthvað síðast svo hérna koma fullt af myndum. Mér væri ánægja ef þú, lesandi góður, myndir njóta þeirra. Frekari myndir ásamt magnþrungnum frásögnum er að finna á vefsetri Barðstrendinga og Maríu.

Það er greinilegt að fjölskyldan er þaulvön því að sitja í limósínu. Adda Mæja meikaði ekki að sitja aftur í hörðu sæti í sporvagni, eins og þegar hún tók sporvagninn frá Union Square til Fisherman's Dwarf, svo hún pantaði limmu. Móður minni fannst ekkert meira eðlilegt en að sitja í limmu.

Allt að verða vitlaust í San Fran.

Viðar margsuðaði að fá að hitta vini sína á þessum næturklúbbi í Sausalito. Við létum undan og fengum okkur indverskan heimsborgaramálsverð við lifandi tónlist. Vinur Viðars lék fyrir okkur á ýmis indversk hljóðfæri, íklæddur hvítu laki sem hann (Viðar) var búinn að kúka í. Það fannst okkur gott.

Golden Gate.

Hress systkini á St. Erling vínekrunni í Napa. Fyrir framan þau eru ég og Adda Mæja.

Ægifagrar vínekrur í Napadalssýslu.

Vínbændur í Napahéraði voru almennt sammála um að hafa sjaldan séð eins ölvaða fjölskyldu í vínsmökkun.

Borghildur sýndi fjölskyldunni allt það helsta sem Stanfordkampúsinn hefur upp á að bjóða. Sáum meðal annars þetta fallega fólk sem líktist skuggalega fjölskyldumeðlum mínum. Næstum því vandræðalegt.

Unga kynslóðin og fulltrúi þeirra gömlu í Barnes Court, Stanford.

Hekla og Afi Erlingur í San Fran.

Ég og pápi á Union Square.

Lítill afakall.

Það verður seint sagt um Gunnar Magnús að hann sé ekki hress. Þrátt fyrir að vera búinn að sofa á hótelum í tvær vikur og með allar sínar svefnvenjur í tómu rugli þessa dagana, þá tapar hann ekki gleðinni.

Patti broddgöltur í Solvang.

Hressi mávur minn sá það strax að hann varð að fá sér flottan töffarajeppa eins og mágsi sinn þegar hann kom til Ameríku. Anna og Grímur keyptu þennan fallega Ford Explorer fyrir allt sparifé Heklu litlu.

Hressi Hressason og dóttir hans bregða á leik fyrir framan ljósmyndara á veitingahúsi í Carmel.

Kalíforníuströndin er hugguleg og hress.

Malí eiturhress ásamt Gunsmoke jr.

Smjörbubbi lætur að sér kveða

Jæja, þá er smjörbubbi aftur kominn á internetið. Amín, Hressi og Hekla voru hérna síðustu helgi. Þau fíluðu sig svo vel hérna að Gimmi er búinn að skipta um skóla (hafði áður komist inn í UW, en fékk plássið sitt aftur) og yfirgefa þar með UC Skeinis (sjá www.gayvis.blogspot.com). Stefnir í að þau flytji hingað í Rassfordið í næsta hús bráðlega. Við framlengdum leiguna okkar dulítið og ætlum að sjá hvað setur.

Malí er nú endanlega orðinn meistari eftir að hún skilaði inn ritgerðinni sinni á föstudaginn. Við feðgar eru einstaklega stoltir af stúlkunni. Hún fór með okkur Gunnar Magnús í afslöppunarbátsferð á Lake Washington þegar hún hafði lokið við að skila. Eins og sjá má á innfeldu myndinni var Maríu afar létt að vera búin með verkefnið.

Hressir á fjöllum

Hvers vegna fór skemmtikraftur og fréttamaður með Ómari og Geir að skoða Kárahnjúkasvæðið?

Amín, Grýlur og Hekla í heimsókn

Malí ver verkefnið sitt á morgun. Ég sé um kökur, snittur og með því. Um kvöldið tökum við svo á móti Davisunum Amín, Hressa og Heklu. Þau verða hjá okkur fram á þriðjudag.

Ég var á leiðinni að synda úti í Lake Washington og nýbúinn að klæða mig í blautbúninginn úr Costco þegar Anna hringdi og sagðist vera á leiðinni í heimsókn. Þá prumpaði ég óvart af spenningi eins og sjá má á myndinni.

Búbbírú

Allt vitlaust að gera hérna eins og venjulega. Mæja ver verkefnið sitt á föstudaginn og er því á milljón þessa dagana. Við gáfum okkur þó smátíma á laugardaginn til að bjóða ágætu fólki í mat þar sem hún hafði skilað inn lokadrögum til prófessorsins síns fyrr um daginn. Hún hafði því örlítinn tíma þangað til hún fékk verkefnið aftur til baka. Prófessorinn býr í Laurelhurst hverfinu, sem er eitt flottasta hverfi sem sögur fara af hér í borg. Hann bauð okkur inn til sín í stuttan skoðunartúr um húsið sem var á þremur hæðum niður við Lake Washington með eitruðu útsýni yfir vatnið og Mt. Rainier. Mér skilst að á þessum slóðum fáist ekki hús undir tveimur til þremur milljónum Brandararíkjdala.

Er búinn að verja síðustu tveimur dögum með JB að gera bílinn kláran fyrir heimsreisu okkar Maríu og Gunnars Magnúsar. Nú get ég stoltur sagst kunna að skipta um bremsuklossa, olíu, olíusíu og loftsíu í Grand Karókí. Ef einhver hefur áhuga á að kaupa bílinn - sem hefur aldrei verið sprækari - þá getur sá hinn sami gert kostakaup í San Francisco í lok septembermánaðar.

Nokkrar frískandi myndir fylgja færslu þessari.

Ég keypti QFC-köku til að hafa í eftirrétt. JB og Magnea voru sniðug og keyptu líka trúðahattsköku. Það voru því tvær kökur á boðstólnum síðastliðinn laugardag. Nýtt met í Rassfordinu.

Magnea og Kári í sannkölluðu sumarkapi.

Armin og Líney í sannkölluðu kökuskapi.

Ég í sannkölluðu kaffiskapi.

María að svæfa Gunnar Magnús svo hún geti skellt sér á barinn.

JB og Gunnar Magnús á kampús.

Bandaríski herinn hélt ægilega flugsýningu hérna á dögunum. Hér er hópurinn að pakka niður vatni, kóki og Prins Pólói áður en lagt var í hann.

Voðalega sætt og ákkúrat í anda Bandaríska hersins. Þeir gerðu alls kyns fleiri trix eins og t.d. pray-for-our-troops lykkjuna sem prýðir annan hvern bíl hér fyrir utan borgarmörkin. Mér fannst notalegt að borga mig inn á flugsýninguna enda veit ég að peningarnir fóru í gott málefni; stríðið í Írak, vopn handa Ísraelsmönnum eða í hið æsispennandi stríð gegn hryðjuverkum.

Hressandi fyrirsagnir

Í hvernig borg vilt þú búa í hér á landi á? Góð spurningin undir myndinni sem Óskar varpar fram. Beittur...

Hressleiki í Ameríku

Hvern langar ekki að kæla sig niður með ljúffengri pylsu í hitanum? Þessum manni hlýtur líka að líða vel í búningnum sínum í sólinni. Eins og sjá má á myndinni er Grímur, mávur minn, mættur til Brandararíkjanna.

Við skruppum á steikhús með JB og Magneu á laugardaginn. Að áeggjan JB fékk ég mér stærsta skammt af diet rifjum á steikhúsinu og renndi öllu þessu niður með bestu lyst. JB sagði mér að ég gæti tekið restina með mér heim í box, en hann var bara að bulla því auðvitað kláraði ég þetta. Hann greinilega vissi ekki hvað ég væri búinn að vera lengi í Ameríku. Veitið því eftirtekt hve risakartaflan er ógnarsmá við hlið rifjanna.

Jón Bjarni með sama rétt - eða sami réttur með Jóni Bjarna. JB er sæll og kátur því maður verður seint svangur eftir slíkan kvöldverð.

Gunnar Magnús og Orcun í sólarglensi að lokinni kaffidrykkju á Quadinu á kampús.

Hress karl

Þessi er eiturgóður: http://fff.is/

Sumar og sól

Lífið gengur ágætlega hérna í Seattle. Malí er þrusudugleg í verkefninu sínu og ég sé alveg um Gunnar Magnús á meðan. Það er búið að vera nokkuð gott veður hérna að undanförnu með tilheyrandi hita - máske of miklum. Við erum mikið úti, ýmist á ströndinni, við Green Lake eða hérna úti í Magnuson Park. Erum líka búin að vera dugleg við að fara í Bellevue Square (sem er innimoll) í öllum hitanum og vitleysunni til að kæla okkur niður.

Fór á Thievery Corporation á dögunum ásamt Helgu. Það var þrusustuð. Klappaðir upp tvisvar. Er annars búinn að vera slakur við að fara á tónleika að undanförnu því það er lítið um þrusubönd hérna þessa dagana. Förum samt e.t.v. á Bumbershoot í byrjun september.

Er annars bara búinn að vera duglegur að spila tennis og súpa frappuccino mér til skemmtunar.

Langt síðan ég hef skrifað eitthvað hérna, svo að nokkrar frískandi myndir fylgja með.

Vel varinn fyrir sólinni á Alki Beach.

Hádegismatur á Alki Beach með JB og Magneu. Gunnar Magnús steinsofandi í fanginu á mér. Lífverðir JB láta lítið fyrir sér fara á borðinu við hliðina á okkur og þykjast tala í símann.

Gunnari Magnúsi líður einstaklega vel í 37° stiga hita. Sérstaklega finnst honum gott að komast inn þar sem íbúðin okkar er ekki með loftkælingu og það er rúmlega 30°C steindautt loft inni í svefnherbergi á kvöldin. Þegar hann er að leika sér á teppinu sínu, drýpur af honum svitinn eins og hann sé að koma af skvassæfingu. Það er nú samt að fara að kólna aðeins til allrar hamingju, en hitinn hangir þó áfram í tæpum 30° næstu daga.

Ég og Gunnar Magnús að vinna á taninu við Grín Leik. Eins og sjá má erum við feðgar orðnir skemmtilega kaffibrúnir eftir alla útiveruna.

Fórum með JB og Magneu í grilltúr úti í Magnuson Park í kvöld. Urrandi nautahnullar og SS pulsur á boðstólnum.

Gunnar Magnús fylgist með að nægur logi sé á kertinu sem á að fæla moskítóflögur í burtu.

Þessi áberandi skemmtilegi myndstúfur lýsir kvöldstemningunni í Magnuson Park betur en þúsund orð. Hér erum við að undirbúa grillerý að hætti Hússeins eftir að hafa marínerað okkur í sólarolíu fyrr um daginn.

Nokkrar nýjar myndir

Allt að verða vitlaust í pabbafríinu mínu. Ég og Gunnar Magnús erum búnir að vera duglegir við að horfa á HM í bland við Sesame Street. Göngum nánast daglega ýmist um Magnuson Park, upp í skóla eða höngum á Avinu. Ef Gunnar Magnús suðar mikið, fer ég og spila fyrir hann tennis.

Nokkrar myndir frá undanförnum dögum eru að neðan. Ég og Orcun skelltum okkur á kajak um daginn. Fórum líka á Sonic Youth tónleika ásamt Óla um daginn. Það var aldeilis ágætt.

Svona lítur nú fallega borgin okkar út á góðum sumardegi. Vatnið er þá gjarnan pakkað af skútum, litlum snekkjum og sjóflugvélum.

Space Needle.

Kajakglens á Lake Union. Í bakgrunni, undir I-5 brúnni, sést UWMC, sjúkrahúsið þar sem Gunnar Magnús fæddist.

Orcun réri eins og vitlaus maður meðan ég sat rólegur aftur í og stýrði.

Malí og Gunnar Magnús á leiðinni að kaupa ís á Avinu.

Það kemur fyrir að við Gunnar Magnús heilsum upp á Mæju í skólanum.

Óli og Charlotte komu í fondú til okkar á dögunum. Hér eru þau eiturhress ásamt gestgjöfum að loknum desert.

Magnuson Park brjálæði

Eyddum deginum í dag í Magnuson Park. Það getur nú varla talist merkilegt enda erum við Gunnar Magnús þar nánast alla daga um þessar mundir. Komum bara upp í Radford til að sofa og hitta Mæju. Að þessu sinni komu Kári, Atli og Ásgeir í garðinn þar sem við grilluðum og lékum listir okkar í blaki og frisbí fyrir aðra strandargesti.

Atli, Kári og Mæja pæja í góðu glensi í Magnuson Park. Gunnar Magnús er í bláa tjaldinu. Maðurinn sem liggur hjá bláa kútnum vinstra megin á myndinni liggur hjá bláa kútnum vinstra megin á myndinni.

Malí hlúir að Gunnari Magnúsi í tjaldinu sínu.

Keypti þetta fína blaknet fyrir college fund aurana hans Gunnars Magnúsar í dag. Ég og Ásgeir pökkuðum Sí-Atla og Kára saman trekk í trekk.

17. jóní

Héldum upp á 17. jóní í Fremont ásamt Helgu, Dr. Gunna, Evgeníu og fjölskyldu. Þessa helgi var hin árlega sólstöðuhátíð haldin í Fremont, en þá ganga bæjarbúar um götur með lúðra, básúnur, horn og fleira, ýmist á rassinum eða léttklætt (sjá myndaalbúm). Um kvöldið var svo haldið í pottinn (Helga var að passa rosafínt hús í Fremont), svo í sússíglens og því næst á dansistaði. Alveg hreint ljómandi lýðveldisdagur.

María og Gunnar Magnús í þjóðhátíðarskapi í Fremont.

Gunnar Magnús virðir fyrir sér íslenska fánann í þann mund sem hann veltir fyrir sér hví Hvítbláinn vék fyrir fánanum á myndinni.

Sumir fá sér pönnukökur á 17. júní. Aðrir fara niður í bæ og fá sér kandífloss. Þetta fólk á myndinni hélt hins vegar upp á lýðveldisdaginn á rassinum.

Grillað fyrir frúnna

Rassfordgrill. María mín vill kjöt. Þá fær hún kjöt.

Leiðinlegt...

...að vera í feðraorlofi.

Útskrift

Það hlaut að koma að því. Við Malí útskrifuðumst síðastliðinn laugardag. Malí er samt ekki alveg búin, en hún fékk engu að síður að taka þátt í athöfninni. Hún klárar vonandi í júlí. Fyrst var móttaka hjá deildinni minni um morguninn og að henni lokinni tók við athöfnin sjálf á Husky Stadium. Á meðan sá Helga um Gunnar Magnús, en það var fyrsta pössunin hans. Um kvöldið fengum við síðan til okkar góða gesti.

Ég bið ykkur að njóta myndanna að neðan.

Rétt áður en athöfnin byrjar. Andrúmsloftið gjörsamlega rafmagnað. Líka magnað kyngi. Svo mátti einnig skera það með hnífi. Mikil spenna eins og sjá má.

Ég stilli mér upp við hliðið sem allir helnettir meistarar ganga um.

María gengur inn á Husky-leikvanginn...

...og mannfjöldinn tryllist af kæti.

Ég og Malí í góðri útskriftarstemningu.

Allt að verða vitlaust.

Þessi músíkalska hnáta söng bandaríska þjóðsönginn við góðan orðstýr.

Löðursveittur og hress að lokinni tæplega átta klukkustunda veru í heimskulegum útskriftarbúningi með hatt. Þar sem ég var með fínan hatt, hálfbrann ég á enninu. Það er gott að vera vel klæddur og í dökkum loftþéttum búningi í hita. Það fer einkar lítið fyrir búningnum; hann er þeirrar náttúru gæddur að unnt er að losa bæði þvag og hægðir í honum án þess að nokkur tekur eftir því. Held að nokkrir þarna hafi gert það en er samt ekki viss.

Seinna um kvöldið fengum við til okkar nokkra góða gesti. Ég bakaði að sjálfsögðu köku handa svöngum veislugestum. Innvafða skjalið með rauða borðanum er prófskírteinið hans Péturs. Mér þótti það henta prýðilega sem kökuskraut.

Nokkrir af veislugestum, Liila, Orcun, Tom og Helga, ásamt Malí minni.

Veislugestir fengu grænt Prins Póló. Mér hafði verið bent á rússnenska búð uppi á Aurora Avenue fyrir skömmu. Fyrir fróðleiksfúsa, þá er Aurora ógeðsleg löng gata sem byssubúðir, bílasölur, klámbúllur, tattústofur og drive-through skyndibitastaðir liggja við. Sem sagt týpísk amerísk gata. Daginn eftir að við heyrðum af búðinni, keyrðum við Gunnar Magnús í einn og hálfan tíma eftir kassa af Prins Pólói. Búðin sjálf var teppalögð og illa lyktandi, á stærð við sjónvarpsherbergið á Selbraut, með rússnesnkum vodka, gömlum VHS myndum og hangandi pylsum til sölu. Í einu horninu á búðinni voru fjórir kassar af Prins Pólói, en það var bara til grænt (með ljósu mjólkursúkkulaði) og blátt (með hnetum) Prins Póló - ekki í gylltum umbúðum eins og við eigum að venjast. Ég fékk mér eitt með kóki í bílnum á leiðinni heim og sprændi gjörsamlega í hringi af gleði. Þess má geta að þetta græna er jafnvel betra en það gyllta.

Kondu í fondu

Fondúgeðveiki í Radfordinu í gærkvöldi. Malí, ég, Berkin, Evrin og Orcun í sannkölluðu fondúglensi.

Gunnar Magnús í góðum félagsskap hjá Mike og Jess í kaffinu í dag.

Gunnar Magnús með barnakaffi með jarðarberjabragði.

Ásgeir afmælisbarn reynir hvað hann getur til að hræða Gunnar Magnús. Ásgeir hafði fyrr um morguninn verið vakinn af górillum klukkan sex um morguninn eftir tveggja tíma svefn (sjá hér).

Grand Karókí í mesta rignarsudda sem ég upplifað, hér í Sívætlu. Bílaplanið breyttist í bílasundlaug (e. car pool) í einu vetfangi. Það á nú reyndar að vera bjart og yfir 20° út þessa viku.

Gleðilegan kjördag

Ég og Gunnar Magnús - eiturhressir - að kjósa utankjörfundar hjá Jóni Marvin, konsúlnum okkar í Seattle.

Það er annars gaman að segja frá því að hvorki ég né María vorum nokkurn tímann látin gera grein fyrir því hver við vorum eða sýna fullgild íslensk skilríki. Kannski af því að við erum fræg. Samkvæmt áreiðanlegum heimildum vefsins voru aðrir Íslendingar hér á slóðum heldur ekki látnir sýna íslensk skilríki. Jón Marvin er ekki allt of mikið að stressa sig á því hver er hver. Enda er það kannski ekki aðalatriðið. Ég sagðist til dæmis heita Pétur Vilhjálmsson og kaus Framsókn.

Allir hressir í verkefninu

Það gengur bara ljómandi vel í lokaverkefninu mínu í Administration and Management prógramminu. Ég er með japanska stelpu í hópnum mínum sem skilur ekki ensku, skrifar hana varla og talar hana heldur ekki. Alltaf gaman að vinna að sameiginlegu markmiði þegar allir eru á sömu bylgjulengd. Sérstaklega þegar hún skilur ekkert hvað er í gangi og heldur að ég sé að plotta eitthvað til að halda henni utan hópsins.

Í kvöld hitti svo hópurinn prófessorinn okkar. Þá lenti hin stelpan í hópnum, sem er ein taugahrúga, í því að taugarnar hennar kúkuðu á sig. Prófessorinn benti henni á atriði sem betur mætti fara og þá fór hún að grenja. Þá sagði hann henni að hún væri bara grenjuskjóða, benti á hana og hló dátt.

Lýg því reyndar, en hún fór samt að grenja. Svona er bara þrælskemmtilegt og þjappar hópnum bara betur saman. Klárum 1. jóní og þá er kynning á verkefninu. Þá er skólinn búinn og þann 10. jóní er útskrift.

Fréttir

Var að lesa fréttirnar.

http://www.visir.is/apps/pbcs.dll/article?AID=/20060518/FRETTIR01/105180021/1091.
Mér fannst eitthvað spaugilegt við fyrisögnina. Hljómar eins og "Hugðust prumpa en kúkuðu óvart". Best að poppa popp... æ, ég ruglaðist og kveikti óvart sinu.

Og fyrir þá sem hafa gaman að pjéníngum: http://www.visir.is/apps/pbcs.dll/article?AID=/20060518/FRETTIR01/60518005/1091.
Hvað með það? Dow Jones er drasl vísitala og segir manni ekki neitt. Hún er byggð upp á aðeins 30 félögum og ekki er gert ráð fyrir mismunandi virði hluta eftir félögum. T.d. ef tvö félög, A og B, hafa sama markaðsvirði og sama vægi innan vísitölunnar og markaðsvirði eins hlutar í A er $10 og í félagi B $300, þá er þetta bara allt lagt saman og svo deilt með fjölda félaga. Ef bæði félög fara svo upp um 1% hefur félag B miklu meira vægi heldur en A. Sem sagt, þetta segir manni ekki neitt. Skamm íslenskir fjölmiðlar fyrir að sýna Dow Jones áhuga. Nær væri að segja frá S&P 500.

Ég vona að allir hafi haft bæði gagn og gaman að.

Amerígunnar Erlingsson

þriðjudagur, nóvember 07, 2006

Fondúrugl

þriðjudagur, október 31, 2006

Gámi gám

föstudagur, október 20, 2006

Tilkynning

fimmtudagur, september 21, 2006

Kúluskítur

þriðjudagur, september 19, 2006

Hressandi myndir

laugardagur, september 16, 2006

Grímur fer í skólann

fimmtudagur, september 14, 2006

Verðbólguskot

þriðjudagur, september 05, 2006

Stórfjölskyldan hittist í Kaliforníu

laugardagur, ágúst 19, 2006

Smjörbubbi lætur að sér kveða

Hressir á fjöllum

föstudagur, ágúst 11, 2006

Amín, Grýlur og Hekla í heimsókn

miðvikudagur, ágúst 09, 2006

Búbbírú

Hressandi fyrirsagnir

miðvikudagur, ágúst 02, 2006

Hressleiki í Ameríku

þriðjudagur, ágúst 01, 2006

Hress karl

þriðjudagur, júlí 25, 2006

Sumar og sól

mánudagur, júlí 10, 2006

Nokkrar nýjar myndir

mánudagur, júní 26, 2006

Magnuson Park brjálæði

17. jóní

Grillað fyrir frúnna

fimmtudagur, júní 22, 2006

Leiðinlegt...

mánudagur, júní 12, 2006

Útskrift

sunnudagur, júní 04, 2006

Kondu í fondu

laugardagur, maí 27, 2006

Gleðilegan kjördag

fimmtudagur, maí 18, 2006

Allir hressir í verkefninu

Fréttir

Þrælgóðir pistlar frá Ameríku:

Gamlir gullmolar:

Óvenjuhressir ættingjar

Fólk í Seattle

Gleði